كلام حب - ملتقى الحب و الرومانسية بامتياز كلام حب - ملتقى الحب و الرومانسية بامتياز
recentpost

آخر المواضيع

recentpost
رسائل حب
جاري التحميل ...

قصة حب بالدارجة المغربية



البنات كايتشكاو من العكوزات مور الزواج أنا هادي معكسة لي الزواج

ايييه هاداك العنوان بصاح متافقة معاكم ماشي عكوزتي ولكن كانت غاتكون عكوزتي و تقدر تكون عكوزتي حيت ماحدنا عايشين غانبقا ديما متفاألة و عندي آمال نرجع أنا و الحبيب ديالي.
أنا بنت عادية فحال كاع البنات قريت خديت دبلوم ديالي ولكن مسهلش الله فالخدمة دابا راني كالسا غير فالدار، عرفت دراري من قبل فايتلي بغيت و تكويت و قاسيت و نسيت ولكن هادا اللي كانبغيه دابا موحال واش ننساه، متتجينيش حياتي بلا بيه، 
بلا مانطول عليكم فالهدرة، تعرفت على واحد الولد كايسكن قريب لينا، ساكن ف درب مورانا، ماعمرني عرفتو ولا شفتو حتى وقف علي واحد النهار السلام السلام ختي لاباس عليك لاباس الحمد الله بقيت كانشوف فيه ديك الشوفة ديال آش بغيتي الولد مسكين تلف، معرف مايقولي قالي والو غير حنا جيران و مكنتهادرو ما والو... قتلو انا مكنهدرش مع الدراري ديال الحومة من غير هادوك لي ساكنين قراب لينا. قالي انا دابا بغيت نتعرف عليك قتلو واش باغيني على شي حاجة قالي لا قلتلوو إوا صافي ماكاين لاش نتعارفو و زدت فحالي، الصراحة واخا هو زوين أنا من طبعي مكنعطيش لأي واحد الوقت.




دازت شوية أجوتاني ففايس بوك قلت فراسي هانية نهدر معاه نشوفو فين باغي يوصل و لكن قررت مانقبلو حتى لمنبعد باش مايقولش هادي راها على سبة، لاغد ليه هدر معايا السلام السلام صافا بيخير مهم ماطولناش فالهدرة حيت ماكان تايلقا مايقول أغلبية كان هاكدة حتى وليت كانفكر ندور فيه نقوليه شوف ماتهدر معايا حتى يكون مايتقال (كان عاجبني ولكن كايعجبني ندير العز على راسي مانبينش لبنادم بلي راني كانقلب غير على معامن نهدر) ولكن وليت نعلت الشيطان قلت مافيها باس خليه حتى يمل الراسو، واحد النهار بارطاجيت واحد التصويرة فيها واحد المقولة زوينة إوا جاتو على كانتو جاوب فكومونتير جاوبتو حتى أنا و دزنا هدرنا فالخاص و كانت تقريبا هاديك هي البداية ديال التعارف، حيت من تما بحال إلا بدا يعرف كيفاش يهدر معايا و يجبد الهضرة شوية وليت حتى أنا كاندخل كانهدر معاه قبل مايهدر معايا، شويا ولينا كانهدرو بزاف و منين وصل الصيف ولينا كانصروا و حنا كانهدرو، المهم السيد تاق فراسو و عرف باللي دار بلاستو عندي و هو يعتارفلي. 
قالي باللي ماكانش تايعرفني فمرة حيت أنا ماكنخرجش بزاف، حتى شافني شي مرة وعجبتو بزاف و قالي باللي حتى الدراري دالحومة تايقولو في هدرة زوينة داكشي اللي خلاني نزيد نعجبو و يبدا يبغيني، أنا كنت حاسة باللي كانعجبو ولكن مفكرتش باللي يقدر يكون كايبغيني، بيني و بينكم عجبني الحال عجباتني الهدرة ديال ولاد الحومة اللي قالو فيا و عجبني الحال حيت كايبغيني، و من حيت حتى أنا كان كايعجبني قلتهالو قالي باللي باغي تكون بيني و بينو شي حاجة، قلتلو بالي ماشي مشكيل ولكن حتى حد فالحومة مايعرف حتى تكون شي حاجة رسمية بيناتنا و حتى إلا تلاقينا نتلاقاو بعيد على العينين و هنا فالحومة يتعامل معايا عادي كيفما كان كايتعامل معايا ديما الصراحة ماقال والو، قالي صافي واخة و قالي باللي هو باغي يزيد غير يتعرف علي كثر و من بعد يجي يخطبني حيت هو خدام و مانقصاه حتى حاجة. 




المهم تفاهمنا على كلشي راكوم عارفين أي علاقة كاتبدا فاللول زوينة بزاف، ولكن شوية بشوية تايبداو يتغيرو شي حويجات ولكن كيف تانقولو الحب هو كلشي، الولد بدا يبان على حاقيقتو كثر ولكن ماكنش زعما فيه شي عيب كبير، اللي كان خايب فيه هو كايتعصب دغيا و كايخسر الهدرة بزاف أنا هاد القضية ماكتعجبنيش، ولكن فيه بزاف ديال الحاجات زوينين و هادوك هوما اللي خلاوني نبغيه، أنا كنت باغية نبغيه حيت حسيت بيه كايبغيني، و لقيت فيه بزاف ديال الحاجات من داكشي اللي كنت باغية فراجلي، الحب ديالو ليا خلاني نحس ببزاف دالحاجات زوينين و هادشي اللي خلاني نختار نبغيه و بصح بغيتو من قلبي، ولكن المشكل هو منين قلتهالو قالي نتي غير كاتمتلي عليا ماتتبغيني ماوالو أنا كانعجبك إيه ولكن الحب نتي مكتبغينيش، هضرتو جرحاتني بزاف كنت كنتسناه يعجبو الحال يفرح يقولي حتى هو هضرة زوينة المهم نحس باللي كانبغيو بعضياتنا ماشي يضور في بحال إلا زعما إلا قتلو كانبغيك انربح شي حاجة ماكايناش، أنا قلتهالو باش نفرحو و باش نسمع منو هضرة زوينة و قلتها حيت حاساها ولكن الرد ديالو كان خايب و تعصبت و كان هادا هو السباب ديال الخصومة اللولة ديالنا، دازت شي عشر يام المهم توحشتو قلت مافيها باس الولد كايبغيني و حتى أنا كانبغيه نسول فيه، كانت مازالة عندي نمرتو صيفتلو ميساج لقيتو حتى هو قلبو طايب و توحشني حتى هو، هي هاديك رجعنا نهضرو، رجعنا زوينين ولكن مازال نفس المشكل مافهمتوش علاش زعما كايفكر هاكدا، صافي قلت فراسي انسبر و نخليلو شوية ديال الوقت راه غادي يفهم و يحس بيا الراسو، دوزنا يامات ولكن الدري مازال هو هو غير نقوليه كنبغيك ولا نقصدها كيعوج الهدرة و تايبغي يوصلي باللي مازال مامتيقش كان هدشي كايعصبني ولكن كنت كانكمها فقلبي و تانقول ماكاين لاش نتخاصمو على وديت هادشي، ولكن واحد النهار زاد فيه بدا كايحكر بزاف فهاد القضية ماعرفتوش فين باغي يوصل وانا ندور فيه دورة دالزمان كيف كانقولو و دابزنا، هاد المرة صافي قلت فراسي مابقالي مانزيد معاه على حاجة بسيطة شوف آش دايرلي، تايهدر بحال إلا حصلني كانخونو ولا مانعرف و من فوق هادشي هو اللي جا لصقني النهار اللول، صافي عصبني بزاف مسحت كولشي مسحت أي حاجة كتربطني بيه ولا تفكرني بيه، حيدتو من فايس بوك و بلوكيتو. 



صافي بغيت ننساه و حيت ماكانشوفوش فالحومة و حيدت أي حاجة ديالو صافي دوزت واهض ليامات اللولة ديما كانفكر فيه و كنتوحشو بزاف دازت شوية ديال الوقت بديت كانولف و كاننساه شوية، حتى جا واحد النهار خرجت مصخرة للحانوت عادي كيف ديما، مع كان عامر بقيت واقفا شوية وهي واحد المرة جات وقفات حداية، أنا ماعمرني شفتها المهم بدات كاتضحك معايا و حتى أنا درت معاها الصواب و ضحكت معاها هي هاديك خديت داكشي اللي كنت باغية قاتلي ساينيني حتى نوصلك فالطريق بقات غير كضحك معايا، دخلات لي لخاطري منين وصلت للدار قالت لي عطيني نمرتك نبقا نسول فيك باش نوليو صحابات عطيتهاليها وانا تنقول فراسي هادي %100 باغية شي حاجة مايمكنش واحدة قدها غادية تبغي تبدا غاد تشد الهضرة مع وحدة قدي كنت كنقول هادي غالبا غيكون عندها شي ولد للزواج و دارت هاد لفيلم. هي هاديك لاغد ليه عايطات ألو السلام السلام كيف بقيتي؟ أنا خالتك فلانة كيف صبحتي ؟ لاباس الحمد لله أخالتي ونتي لاباس ؟ لاباس الحمد لله، المهم راني بغيت نشوفك. ياك لاباس أخالتي؟ لا والو أبني غير بغيت نهضر معاك فواحد الموضوع، دخلاتلي الشك قلت ليها واش مايمكنش تقوليلي هاد الهضرة غير هنا فالتلفون حيت ضارنا را ماكيخليونيش نخرج بزاف ؟ قاتلي ديري براسك خارجة غير التصخري أنا النيت ماغاديش نشدك بزاف، صافي خرجت عندها ديك الساعة. إوا بدات بشوية دالصواب من بعد خرجات من روندتها و قاتلي الصراحة را ولدي شافك و عجبتيه قاتلي حنا را كانسكنو غير موراكوم، ماجانيش هو كاع فالبال قلت بقيت كاندور فراسي الولاد اللي ساكنين تما و هي تتهضرلي على ولدها شوية هي تقولي فاين خدام عرفتي بحال إلإ صرفقاتني ماكنتش متوقعاها، درت براسي ماعرفتوش و بقيت كانزيد نسمعليها باش نتأكد، ختكم ماقدتها فرحة (مني كانتفكر داك النهار كايجيني راسي بحال ديك خيتي مني صاقت لخبار باللي حبيبها ايجي يخطبها).
مشيت طايرة للدار، كانقول غير إمتا نوصل و نسد عليا و نغني و نزغرت و نشطح و نضحك بالجهد، وصلت للدار لقيت ماما فالباب عنقتها بالجهد و كنبوسها و هي ماعرفات والو، مافهمات حتى حاجة بقات كاتقولي غا قوليلي مالك، إوا صافي قلت مني القادية جات من مو غي نعاود لمي، عاودت ليها القضية من طاق طاق تال السلام وعليكم. فرحاتلي و عنقاتني مور داكشي عايطاتلي مو قاتلي بلي را بغات تجي عدنا للدار، رحبت ليها قلت ليها اجي فوقما بغيتي قاتلي أتجي من بعد يومين المهم وجدت الشهيوات باش زعما نوريها حنة يديا المهم جات رحبنا بيها... و قاتلي بداي تجي عندي أنا بغيت ندير فيها تقيلة مابغيتهاش تقول علي هادي قفقافة... قالت لي لا مني نقولك اجي عندي أجي أنا رابحال ماماك و ماتايعجبونيش البنات اللي فيهوم الكيبر. هي تنطق ماما قالت ليها دابا تجي راغي حشمانة منك دابة.



مشيت عندها المرة اللولة دازت مزيانة حسيت بيها باغياني و تعمالات معايا زوين بالزاف. لكن المرة التانية شفتها كاتشوف فيا فشكل غي كلست شوية و هي تقولي أنا راني مريضة خاسك تبداي تعاونيني قلت ليها أنا نديرك بين عويناتي أخالتي، قاتلي وانودي را واحد الماعن فالكوزينة مازال ماتغسلوش قلت ليها واخة أخالتي مشيت بديت نغسل الماعن هي تقولي آش هاد الغسيل.... مهم شبعاتني هضرة وانا غير ساكتة مابغيتش نجاوبها، هي هاديك بقيت معاها حتى جا ولدها حس بيا مقلقة ماقال والو طلع دوش قالي يالاه نخرجو هي تنقز قالتليه فين أتخرج راك يالاه دوشتي غايضربك البرد واخا هاكداك خرجنا، منين رجعنا من تما ماولينا هضرنا بلوكاني فالفايس و الفواتساب و فالتليفون مافهمت فيه والو، عيطت لماماه هدرات معايا هضرة ناقصة و بطريقة غير مباشرة قالت لي نساي الزواج. 




راكوم عارفين حالتي كيف غاتكون، وحدة كان فيديها كولشي شوية مابقا عندي حتي شي حاجة، تصدمت كانت صدمة ديال حياتي، تذمرت بزاف مابقات عندي كانة لحتى شي حاجة مرضت و ضعافيت و اللي زاد ضرني هو ماما مالقيتهاش فجنبي، ماشي تواسيني و تصبرني بالعكس كاترد لي اللومة أنا، كاتقولي نمشي عندو و نهضر معاه وانا مابغياش نطيح من قيمتي. اللي زاد روني هو واحد صاحبت ماما كاتعرفهم و جات قالت لينا باللي داك النهار فاش خرجت أنا وياه مني رجع مو خاصمت عليه و قاتلو ماعندك مادير بديك البنت المهم عمرات ليه الراس مزيان، و هي غير غايرة مني خافتني نضورو عليها حيت قالت ليك كايبغيني بزاف و هي سحاب ليها أنا ساحراليه!!! 

عن الكاتب

كلام حب

جميع الحقوق محفوظة

كلام حب - ملتقى الحب و الرومانسية بامتياز